Daeth chwe ysgol uwchradd o Sir Benfro ynghyd yn Ysgol Uwchradd Hwlffordd ar ddiwedd y tymor haf i nodi diwedd blwyddyn gyntaf Rhaglen SPARC gyda Seremoni Dathlu ac Wobrwyo arbennig.
“Cydnabuwyd llwyddiannau arbennig y disgyblion a gymerodd ran yn SPARC (Sustainable Power, Renewables, and Construction) – menter a gynlluniwyd i alluogi merched ifanc i archwilio gyrfaoedd yn y meysydd STEM, yn enwedig yn y sectorau ynni ac adeiladu. Mae llwyddiannau’r flwyddyn hon wedi bod yn bosibl diolch i’n haelodau yn y Gynghrair: RWE, Porthladd Aberdaugleddau, Blue Gem Wind, Floventis, Ledwood Engineering, Coleg Sir Benfro, Cyngor Sir Penfro, a Bargen Ddinesig Bae Abertawe,” meddai Hayley Williams, Cyd-arweinydd SPARC yn Coleg Sir Benfro.
Cyflwynwyd nifer o wobrau yn ystod y seremoni, gan gynnwys:
- Ymarferydd Mwyaf Brwdfrydig – a roddwyd i Claire Phillips, Ysgol Bro Gwaun, am ei hymrwymiad eithriadol i gefnogi’r rhaglen SPARC.
- Gwobrau Cyfraniad – a gyflwynwyd i ddisgyblion o bob ysgol am eu brwdfrydedd a’u hymroddiad.
- Gwobrau Weldio – i gydnabod y sgil a’r penderfyniad a ddangoswyd yn ystod gweithdai ymarferol.
Rhannodd y siaradwr gwadd, Alex Britton, Uwch-arolygydd Morol yn Svitzer ac un o ddim ond tair arweinydd gweithredol benywaidd yn y cwmni ar draws y DU, ei thaith ysbrydoledig i’r sector morol. Anogodd ei haraith rymus y disgyblion i gofleidio llwybrau gyrfa anghonfensiynol ac i werthfawrogi nid yn unig arbenigedd technegol ond hefyd arweinyddiaeth gynhwysol, seiliedig ar werthoedd.
Wrth fyfyrio ar ei phrofiad yn arwain timau mewn amgylcheddau a ddominwyd yn draddodiadol gan ddynion, pwysleisiodd Alex bwysigrwydd bod yn weladwy a chael cynrychiolaeth: “Mae cynrychiolaeth yn bwysig. Mae modelau rôl yn bwysig. Mae angen mwy o ferched yn y maes hwn—nid yn unig wrth y bwrdd, ond wrth y llyw, yn llywodraethu’r llong.”
Credai fod ei llwyddiant yn deillio o’r merched cryf yn ei theulu a’r mentoriaid ysbrydoledig a’i harweiniodd, gan hyrwyddo’r gred bod empathi, gwytnwch a chwilfrydedd yr un mor hanfodol â hyfforddiant technegol wrth adeiladu gyrfa ystyrlon.
“Eleni, cofrestrwyd 172 o ferched ar Raglen SPARC, gyda dros 90 sesiwn ymgysylltu wedi’u darparu—llawer ohonynt mewn cydweithrediad â phartneriaid diwydiannol lleol. O ddylunio platfformau gwynt arnofiol i roi cynnig ar weldio, cafodd disgyblion brofiadau ymarferol, wynebu heriau go iawn, a datblygu sgiliau newydd,” meddai Rob Hillier, Cyd-arweinydd Cynghrair SPARC yn Coleg Sir Benfro.
Os oes gennych chi neu’ch busnes ddiddordeb mewn ymuno â Chynghrair SPARC, neu am gynnig sesiwn ymgysylltu i ddysgwyr, cysylltwch â:
Hayley Williams – hayleyw@pembrokeshire.ac.uk neu
Holly Skyrme – holly.skyrme@pembrokeshirecoastalforum.org.uk
