Yn ddiweddar, fe wnaeth myfyrwyr o golegau ar draws gorllewin Cymru wynebu’r her o greu busnes newydd fel rhan o drydedd Cystadleuaeth Menter Ranbarthol Gorllewin Cymru flynyddol.
Gydag economïau gwledig gorllewin Cymru yn cael eu hadeiladu ar ficrofusnesau, mae’r gystadleuaeth yn un o fecanweithiau allweddol y rhanbarth ar gyfer ymgysylltu ag entrepreneuriaid ifanc a rhoi’r cymorth iddynt ddatblygu syniadau busnes gyda’r gobaith y byddant yn dwyn ffrwyth rhyw ddydd.
Mewn menter ar y cyd rhwng Syniadau Mawr Cymru, Busnes Cymru, Busnes mewn Ffocws a’r tri choleg lleol, anogwyd myfyrwyr o bob rhan o Sir Gaerfyrddin, Ceredigion a Sir Benfro i gymryd rhan.
Cafodd ymgeiswyr y gystadleuaeth eu herio i greu busnes newydd mewn un o bum sector allweddol; Twristiaeth, Bwyd, Manwerthu, Gofal neu’r Diwydiannau Creadigol. Lansiwyd y gystadleuaeth ar 10 Tachwedd 2021 a chyhoeddwyd yr enillwyr mewn digwyddiad yng Nghaerfyrddin ar 2 Mawrth. Roedd y busnes i fodoli ar bapur yn unig, ond byddai’n cael ei farnu ar ba mor debygol y byddai o lwyddo.
Nod y gystadleuaeth flynyddol hon yw meithrin entrepreneuriaid ifanc a chynnig nid yn unig cymorth ariannol ond cymorth busnes parhaus i’w helpu i ffynnu.
Taflodd dysgwyr Coleg Sir Benfro eu hunain i’r her gyda’r dysgwr Safon Uwch Tom Wickens yn cael ei goroni’n enillydd cyffredinol yn y Categori Bwyd gyda’i fusnes ‘Plumstone Welsh Bakes’. Dyma’r ail flwyddyn i ddysgwyr Coleg Sir Benfro ennill y Categori Bwyd.
Mynychodd Tom y digwyddiad yr wythnos diwethaf i gasglu ei wobr oddi wrth noddwr y categori bwyd, Hilltop Honey. Er mai dim ond am syniad busnes oedd y gystadleuaeth, mae busnes Tom ar ei draed ac yn mynd o nerth i nerth. Roedd cais Tom i’r gystadleuaeth yn ymwneud ag estyniad arloesol arfaethedig i’r busnes. Dywedodd Tom: “Allwch chi byth fod yn rhy ifanc i ddechrau busnes. Byddwn yn cynghori eraill i wneud llawer o ymchwil marchnad a dod o hyd i fwlch yn y farchnad sydd â photensial. Mae angen i chi fod yn angerddol hefyd! Dysgais fy holl sgiliau pobi gan fy mam ac mae’r Coleg wedi fy nghefnogi gyda’r freuddwyd hon. Maen nhw wedi bod mor garedig â darparu deunyddiau marchnata wedi’u brandio i mi eu defnyddio mewn digwyddiadau amrywiol.”
Fe wnaeth cydlynydd menter yn y Coleg, David Gleed, gefnogi’r dysgwyr ac ychwanegodd: “Rwyf wrth fy modd yn cymryd rhan mewn cystadlaethau fel hyn sydd wir yn caniatáu i ddysgwyr ddatblygu eu syniadau busnes gyda chefnogaeth gweithwyr proffesiynol y diwydiant. Llongyfarchiadau i bawb a gyrhaeddodd y rownd derfynol ac, yn arbennig, i Tom a’i gacennau blasus.”
Hoffai’r trefnwyr drosglwyddo eu diolch diffuant i’r pum noddwr, un ar gyfer pob un o’r pum maes busnes.
