Sicrhaodd myfyrwyr Coleg Sir Benfro 11 o fedalau yn Rowndiau Terfynol Cystadleuaeth Sgiliau Cymru yn ddiweddar.
Wedi’u cynllunio i roi’r myfyrwyr gorau o bob rhan o Gymru yn erbyn ei gilydd mewn cystadlaethau dwys sy’n cwmpasu dros 50 o sectorau diwydiant, nod Cystadleuaeth Sgiliau Cymru yw galluogi pobl ifanc i gyflawni eu potensial llawn wrth godi eu lefelau sgiliau i ddiwallu anghenion cyflogwyr.
Heb eu cynhyrfu gan natur rithwir cystadlaethau eleni, cystadlodd myfyrwyr Coleg Sir Benfro mewn ystod eang o gystadlaethau gan gynnwys Cerddoriaeth Boblogaidd, Weldio, Sgiliau Cynhwysol, Cynhyrchu Fideo Digidol, Dylunio Gwe, Dylunio Graffig, Trin Gwallt a Therapi Harddwch.
Mewn seremoni wobrwyo ar-lein, aeth medalau Aur i: Zoe Price am Ddylunio Graffig; Bramwell Simpson ar gyfer Dylunio Gwe; a Deriece Raimann ar gyfer Weldio. Aeth medalau arian i: Kyle Robertson am Ffitrwydd Gynhwysol; Ross Jones am Weldio; a Cromatics am Gerddoriaeth Boblogaidd (Mollie Evans, Izzy Nixon, Ffion Rees, Zac Worthington ac Emilie Zatac). Yn y cyfamser sicrhaodd Declan Morrissey fedal Efydd am Y Cyfryngau Cynhwysol.
Bydd myfyrwyr nawr yn cymryd rhan yng nghystadlaethau rhanbarthol WorldSkills i weld a allan nhw gymhwyso ar gyfer rowndiau terfynol y DU. Cynhelir y rhain ym mis Tachwedd bob blwyddyn lle bydd myfyrwyr yn cystadlu yn erbyn y gorau yn eu dewis faes ledled y DU. Gallai llwyddiant yn Rowndiau Terfynol y DU eu gweld yn mynd ymlaen i ddod yn rhan o garfan y DU ar gyfer Rowndiau Terfynol rhyngwladol WorldSkills. Gyda hanes hir o lwyddiant mewn cystadlaethau sgiliau, mae Coleg Sir Benfro yn obeithiol y bydd rhai o’r rhai a restrir uchod yn ymuno â nifer cynyddol o fyfyrwyr colegau yn mynd drwodd i Squad UK. Fe wnaeth dau gyn-fyfyriwr y Coleg gystadlu yn Rowndiau Terfynol y Byd yn Rwsia yn 2019 ac mae dau fyfyriwr ar hyn o bryd yn gobeithio cystadlu yn Shanghai yn 2022.
Dywedodd Pennaeth Coleg Sir Benfro, Dr Barry Walters: “Mae dysgwyr Coleg Sir Benfro unwaith eto wedi gwneud y Coleg, y sir a nhw eu hunain yn browd iawn. Mae yna lawer iawn o dalent ymhlith ein pobl ifanc ac rydyn ni’n falch iawn o allu eu helpu i loywi eu sgiliau i fod y gorau yn eu dewis faes. Mae sicrhau medalau ar lefel genedlaethol yn gyflawniad enfawr a hoffwn longyfarch yr enillwyr a hefyd i’r staff am y gwaith caled a wnânt i alluogi eu myfyrwyr i gystadlu ar y lefel hon.
“Dros y blynyddoedd diwethaf rydym wedi gweld niferoedd cynyddol o fyfyrwyr Coleg Sir Benfro yn cystadlu’n lleol, yn genedlaethol a hyd yn oed yn rhyngwladol. Y bobl ifanc hyn yw ein gweithlu yn y dyfodol felly mae eu gweld yn rhagori ar draws cymaint o sectorau diwydiant yn rhoi gobaith mawr i mi am ddyfodol ein heconomi.”
Wedi’i ariannu gan Lywodraeth Cymru, mae’r cystadlaethau’n cael eu rhedeg gan rwydwaith o golegau, darparwyr dysgu yn y gwaith a sefydliadau a arweinir gan gyflogwyr.
