Yr wythnos diwethaf cynhaliodd Coleg Sir Benfro y Gystadleuaeth Ynni Adnewyddadwy gyntaf fel rhan o gyfres o gystadlaethau Cystadleuaeth Sgiliau Cymru gyda’r nod o godi lefelau sgiliau mewn dros 60 o feysydd cwricwlwm.
Daeth bron i 30 o fyfyrwyr o golegau ledled Cymru ynghyd ar gyfer y digwyddiad agoriadol a noddwyd gan Gwynt Glas – menter ar y cyd, fferm wynt alltraeth sy’n cael ei datblygu gan EDF Renewables a DP Energy.
Gweithiodd y myfyrwyr mewn timau o bedwar i ddatblygu syniadau arloesol ar gyfer datrysiad ynni adnewyddadwy ar gyfer ynys ffuglennol oddi ar arfordir Cymru sy’n dibynnu ar hyn o bryd ar generaduron diesel sy’n heneiddio. Cyflwynwyd y briff i fyfyrwyr cyn y digwyddiad i ddechrau gweithio ar eu datrysiadau gyda dimensiynau ychwanegol yn cael eu hychwanegu yn ystod y dydd i’w herio hyd yn oed ymhellach.
Roedd Andrew, myfyriwr Lefel-A, yn rhan o dîm Coleg Sir Benfro a dywedodd: “Mae Coleg Sir Benfro wedi rhoi cyfle gwych i mi. Mae wedi bod yn wirioneddol wych; mae’n mynd yn rhyfeddol o dda a dw i wrth fy modd!”
Ychwanegodd Adam, myfyriwr Peirianneg o dîm Coleg Merthyr Tudful: “Ffynonellau ynni adnewyddadwy yw ffordd y dyfodol ac mae cael y cyfle i wneud prosiect fel hwn yn ein cynorthwyo i gyflawni ein gradd mewn Peirianneg.”
Y gystadleuaeth gyntaf o’i math yng Nghymru, gofynnwyd am fewnbwn gan arbenigwyr yn y diwydiant i sicrhau bod y briff mor realistig â phosibl. Fel rhan o’r gystadleuaeth, roedd pob tîm hefyd yn gallu archebu slot gydag ymgynghorwyr o DP Energy, i brofi eu damcaniaethau a cheisio cyngor arbenigol ar hyfywedd eu datrysiadau arfaethedig.
Roedd Chris Williams, Pennaeth Datblygu’r DU a Marchnadoedd Newydd, DP Energy yn un o’r ymgynghorwyr a’r beirniaid ar gyfer y gystadleuaeth a dywedodd: “Mae’r timau sydd wedi cymryd rhan yn her Ynni Adnewyddadwy gyntaf Cystadleuaeth Sgiliau Cymru wedi gwneud cymaint o argraff arnaf. Roedd yr her a osodwyd yn gymhleth ac ymgeisiodd pob un o’r cyfranogwyr eu hunain 100% i’r dasg a arweiniodd at feddwl a datrys problemau arloesol, allan o’r bocs! Nid oedd unrhyw ddau ddatrysiad yr un peth. Dydyn nhw ddim wedi ei gwneud yn hawdd i’r panel beirniadu.
“Fel Datblygwr Ynni Adnewyddadwy gyda swyddfa yng Nghymru, mae’n gyffrous gweld brwdfrydedd a dyfeisgarwch y myfyrwyr hyn. Rwy’n gobeithio y bydd y profiad hwn yn eu hannog i ystyried gyrfa yn y sector ynni adnewyddadwy o ddifrif.”
Yn ogystal â Chris Williams a Lee Watt o DP Energy, beirniaid y gystadleuaeth oedd Paul Ellsmore (Rheolwr Rhaglen MEECE), Rebecca Williams (Cyfarwyddwr Cymru, Ystad y Goron), Claire Palmer (Cyfarwyddwr Rhanddeiliaid, Menter Môn Morlais) a Tim Brew (Rheolwr Addysg, Fforwm Arfordirol Sir Benfro).
Dywedodd trefnydd y gystadleuaeth, Arwyn Williams, Pennaeth Cyfadran yng Ngholeg Sir Benfro: “Mae hon wedi bod yn gystadleuaeth gyffrous, gan godi ymwybyddiaeth o rôl gynyddol bwysig cynhyrchu ynni adnewyddadwy, y cyfleoedd a’r heriau. Mae’r gystadleuaeth hon hefyd wedi helpu i ddatblygu rhai o’r sgiliau sydd eu hangen i weithio yn y diwydiant: datrys problemau, gwaith tîm, cyfathrebu effeithiol, rheoli adnoddau ac arweinyddiaeth.
“Nid oes gennyf unrhyw amheuaeth y bydd y digwyddiad hwn yn helpu i baratoi ein myfyrwyr ar gyfer y newid i sero net. Rydym yn ddiolchgar i’n noddwyr Gwynt Glas sydd wedi cefnogi’r gystadleuaeth beilot hon a gobeithio y bydd yn parhau i ennill momentwm.”
Wedi’i ddatblygu mewn ymateb i’r buddsoddiad enfawr sy’n cael ei wneud i ddod o hyd i ddatrysiadau ynni cynaliadwy, a’r datblygiadau presennol sy’n digwydd yn y Môr Celtaidd, y gobaith yw, trwy’r gystadleuaeth, a thrwy weithio gyda gweithwyr proffesiynol y diwydiant, y bydd y myfyrwyr yn cael eu hysbrydoli i ddilyn gyrfaoedd mewn datblygu datrysiadau arloesol i ddatgarboneiddio.
Dywedodd Mark Hazelton Cyfarwyddwr Prosiect Gwynt Glas: “Nid yw’r achos dros fwy o gapasiti ynni adnewyddadwy erioed wedi bod yn gryfach. Rydym yn falch iawn o gefnogi’r gystadleuaeth hon a fydd, gobeithio, yn ysbrydoli dysgwyr ifanc ac yn eu hannog i ddilyn llwybrau gyrfa yn y sector ynni adnewyddadwy sy’n tyfu.
“Gall cystadlaethau fel y rhain godi braw ond da iawn i bawb sydd wedi cymryd rhan a phob lwc!”
Roedd y timau oedd yn cystadlu o Goleg Sir Benfro, Coleg Merthyr, Coleg Gwent, Coleg Caerdydd a’r Fro a Choleg Menai. Bydd y tîm buddugol yn cael ei gyhoeddi ar 9 Mawrth.
