Mae dysgwr gwaith saer Coleg Sir Benfro, Conor Ratcliff wedi cyrraedd y deg olaf yng nghystadleuaeth Prentis Masnach y Flwyddyn Screwfix eleni.
Bellach yn ei seithfed flwyddyn, mae’r gystadleuaeth yn dathlu’r genhedlaeth nesaf o grefftwyr wrth iddyn nhw ddechrau ar eu gyrfa. Gyda dros 2,500 o enwebiadau, roedd Conor ar y rhestr fer i’r 30 uchaf lle bu’n rhaid iddo gyflwyno cyflwyniad fideo i feirniaid a chynrychiolwyr cyrff masnach sy’n arwain y diwydiant. Wedi’i farnu ar broffesiynoldeb, creadigrwydd, arloesedd, brwdfrydedd a gwybodaeth am eu crefft, gwnaeth Conor argraff ar y beirniaid ac mae bellach yn y 10 olaf.
Dywedodd Simon Jackson, Cyfarwyddwr Cwsmer a Digidol Screwfix: “Bob blwyddyn rydym yn rhyfeddu at ansawdd rhagorol y cystadleuwyr ac, eleni, rydym yn chwilio am brentisiaid sy’n mynd y tu hwnt i’r disgwyl i lwyddo yn y grefft o’u dewis.
“Rydyn ni wedi gweld sut mae’r acolâd hwn sy’n rhoi hwb i yrfa a’r bwndel gwobrau gwerth £10,000 yn helpu i ddechrau gyrfa prentis. Hoffwn ddymuno pob lwc i bawb sydd drwodd i’r rownd yma!”
Mae’r pecyn gwobr yn cynnwys popeth y gallai fod ei angen ar grefftwyr yn y dyfodol i gychwyn eu busnes eu hunain gan gynnwys £5,000 o offer, cyllideb hyfforddi o £3,000 a thechnoleg gwerth £2,000. Bydd y coleg lle maen nhw’n astudio hefyd yn derbyn £2,000.
Mae Conor wrth ei fodd ei fod wedi cyrraedd y rownd derfynol a dywedodd: “Mae’n anrhydedd mawr i mi gyrraedd mor bell â hyn yn y gystadleuaeth ac rwy’n gyffrous iawn am y digwyddiad terfynol. Byddai’n gyfle anhygoel i mi pe bawn i’n ennill y gystadleuaeth hon.
“Rwy’n gobeithio ei fod yn annog mwy o bobl i ystyried prentisiaeth mewn crefft, mae’r adran Gwaith Saer wedi bod yn hynod gefnogol yn ystod fy astudiaethau.”
Disgwylir i’r Rownd Derfynol gael ei chynnal yn fuan lle bydd y beirniaid yn cynnal cyfweliad ar-lein gyda’r deg yn y rownd derfynol cyn dewis a chyhoeddi eu henillydd.
