Unedau wedi’u harholi – arholiadau ar-lein

• Hanfodion TG – Yr uned hon yw sylfaen y cymhwyster hwn. Byddwch yn dysgu am galedwedd a meddalwedd cyfrifiadurol ac yn ennill dealltwriaeth o sut i gynnal a chadw caledwedd a meddalwedd a sut i gadw’n ddiogel wrth i chi gyflawni’r tasgau hyn. Byddwch hefyd yn dysgu am y manteision i chi a busnesau o ddefnyddio TG a’r rhyngrwyd i’ch helpu i baratoi ar gyfer gyrfa yn y sector Technoleg Gwybodaeth.
• Hanfodion Seiberddiogelwch – Mae’r uned hon wedi’i chynllunio i’ch galluogi i ennill gwybodaeth a dealltwriaeth o rai o’r bygythiadau a’r gwendidau a all gael effaith ar unigolion a sefydliadau. Byddwch yn dysgu am rai o’r mesurau y gellir eu defnyddio i amddiffyn rhag ymosodiad seiberddiogelwch.

Unedau gwaith cwrs

• Creu atebion rhaglennu ar gyfer busnes – Bydd yr uned hon yn eich galluogi i archwilio cyfleoedd swyddi i raglenwyr. Yna byddwch yn mynd ymlaen i archwilio ieithoedd rhaglennu a’r cyd-destunau y gellir eu defnyddio ynddynt. Byddwch yn cynllunio ateb busnes gan ddefnyddio iaith raglennu, yn creu’r rhaglen gan ddefnyddio amgylchedd datblygu priodol, yn profi’r rhaglen ac yn myfyrio ar y rhaglen a grëwyd. Ar ôl cwblhau’r uned hon byddwch yn gwybod am opsiynau iaith ynghyd â chystrawen, strwythur a chynllun iaith raglennu a byddwch yn gallu eu cymhwyso i ateb rhaglennu.
• Defnyddio technolegau sy’n dod i’r amlwg – Mae’r byd digidol yn ehangu’n barhaus. Mae’r uned hon yn edrych ar nodweddion a defnyddiau posibl technolegau sy’n dod i’r amlwg, er enghraifft, dyfeisiau gwisgadwy, deallusrwydd artiffisial, rhith-realiti, realiti estynedig (AR), argraffu 3D, 5G a roboteg. Byddwch yn ystyried sut y gellir defnyddio technolegau sy’n dod i’r amlwg i gefnogi busnesau ac yn egluro manteision ac anfanteision y technolegau hyn. Byddwch hefyd yn gallu nodi effeithiau yn y dyfodol o gymhwyso’r technolegau newydd hyn.
• Creu gwefannau – Bydd yr uned hon yn rhoi’r wybodaeth a’r sgiliau sydd eu hangen arnoch i adolygu a diweddaru gwefannau presennol a’u cydrannau. Mae gwefannau yn offeryn hanfodol i sefydliadau gyflwyno’r wybodaeth sy’n ymwneud â’r nwyddau a’r gwasanaethau marchnad maen nhw’n eu cynnig ac yn gyffredinol hyrwyddo’r busnes. Mae sut a pham mae sefydliadau’n defnyddio gwefannau yn dod yn fwyfwy pwysig.
• Creu apiau symudol ar gyfer busnes – Mae technoleg symudol yn dod yn fwyfwy cyffredin o fewn cymdeithas, o safbwynt personol yn ogystal ag o fewn busnes. Bydd dysgwyr yn ennill dealltwriaeth o ddefnyddiau apiau symudol ar gyfer busnes a chynllunio, creu, diweddaru a gwella apiau symudol.
• Creu gemau – Mae dylunio gemau yn faes poblogaidd o fewn y diwydiant sy’n parhau i ddatblygu cysyniadau a thechnolegau newydd, gan ddenu cynulleidfa amrywiol llawer ehangach gyda gofynion lluosog ar gyfer llwyfannau lluosog. Byddwch yn cael y cyfle i ddefnyddio hanfodion dylunio gemau, gan gaffael y sgiliau i gynhyrchu gemau o ddyluniadau gemau ac archwilio sut i wella’r gemau trwy ymgorffori nodweddion ychwanegol.
• Cyflwyno’r cynnyrch – Yn yr uned hon byddwch yn dysgu am gyflwyno cynnyrch i gleient a’r gwahanol ddulliau cyfathrebu a ddefnyddir i gyflwyno cynhyrchion i randdeiliaid. Byddwch yn defnyddio un o’r cynhyrchion rydych chi wedi’u cynhyrchu i gyflawni hyn. (Rhaglen, gêm, ap symudol neu wefan).